ആരുമില്ലാത്ത രോഗികള്‍ക്ക് ഒരു വിളിക്കപ്പുറം ഇവിടെ സിബിനുണ്ട്

കോട്ടയം മെഡിക്കല്‍ കോളേജില്‍ ചെല്ലുന്നവര്‍ക്ക് ഈ യുവാവിനെ കണ്ടു പരിചയം കാണും. മെലിഞ്ഞ്, വലിയ വസ്ത്രത്തിനുള്ളില്‍ കയറി, കാലില്‍ ചെരിപ്പ് പോലുമില്ലാതെ എപ്പോഴും ഊര്‍ജ്ജസ്വലനായി അങ്ങിങ്ങോടി നടക്കുന്ന സിബിന്‍ എന്ന ഈ 22 കാരനെ ശ്രദ്ധിക്കാതിരിക്കാന്‍ വഴിയില്ല. ഇവിടെ അഡ്മിറ്റ്‌ ചെയ്യുന്നവര്‍ക്ക് എപ്പോഴും എന്തിനും കൂട്ടായി സിബിനുണ്ട്.

വർഷങ്ങൾക്ക് മുമ്പ് വീട് വിട്ടു കോട്ടയം മെഡിക്കല്‍ കോളേജില്‍ വന്നതാണ് സിബിന്‍. അന്ന് മുതല്‍ പാവപ്പെട്ടവര്‍ക്കും ആരുമില്ലാത്തവര്‍ക്കും സഹായിയായി. ഒരു വിളിക്കപ്പുറം ഓടിയെത്താന്‍ പാകത്തില്‍ രാത്രികാലങ്ങളില്‍ ആശുപത്രി വരാന്തകളില്‍ കിടന്നുറങ്ങി.

ഓരോ ദിവസവും 500 ഓളം ആളുകള്‍ക്ക് സൗജന്യമായി ഭക്ഷണം കൊടുക്കുന്നുണ്ട് ഇന്ന് സിബിന്‍. വാടകയ്ക്ക് താമസിക്കാന്‍ പണമില്ലാത്ത എട്ടോളം കൂട്ടിരിപ്പുകാര്‍ക്ക് സൗജന്യമായി താമസ സൗകര്യം കൊടുക്കുന്നു. മറ്റുള്ളവരില്‍ നിന്ന് സംഭാവനകള്‍ സ്വീകരിച്ചാണ് സിബിന്‍ ഇതെല്ലാം ചെയ്യുന്നത് .

ഇവര്‍ക്കിടയില്‍ സിബിനെ വ്യത്യസ്ഥനാക്കുന്നത് മറ്റൊന്നാണ്. ഈ കിട്ടുന്ന കാശില്‍ നിന്ന് സ്വന്തമാവശ്യത്തിനു ഒരു രൂപ പോലും ആള്‍ എടുക്കാറില്ല .ഉപയോഗിക്കുന്ന വസ്ത്രം പോലും മറ്റുള്ളവര്‍ കൊടുക്കുന്ന പഴയ വസ്ത്രമാണ്.

അഭയം ചരിറ്റബിള്‍ ട്രെസ്റ്റ് എന്ന പേരില്‍ സിബിന്‍ ഒരു കാരുണ്യ സംഘടനയും രൂപീകരിച്ചിട്ടുണ്ട്. ഈ വര്‍ഷം അതിന്‍റെ രണ്ടാം വാര്‍ഷികം ആഘോഷിച്ചു. ഇനിയും കൂടുതല്‍ പദ്ധതികളുമായി മുന്നോട്ടു പോവാനുള്ള ഒരുക്കത്തിലാണ് സിബിന്‍.