നിങ്ങളുടെ ഹല്‍വ ബ്രാന്‍ഡിന് #MeToo എന്ന് പേരിടുമോ?

ചെന്നൈ: അധികാരത്തിന്‍റെ തണലില്‍ സ്ത്രീകളെ ലൈംഗികമായി ഉപയോഗിക്കുന്നവരെ തുറന്നുകാട്ടുന്ന മീടൂ ക്യാംപയ്‍ന്‍ ലോകം മുഴുവന്‍ സോഷ്യല്‍ മീഡിയയിലും പുറത്തും തംരഗമായിട്ട് ഒരുവര്‍ഷമാകുന്നു. 2014ല്‍ തമിഴ്‍നാട്ടിലെ തിരുനെല്‍വേലിയില്‍ തുടങ്ങിയ മീടൂ സ്‍നാക്സ് എന്ന നാടന്‍ പലഹാരക്കമ്പനിക്കും നിര്‍ണായകമാകുകയാണ്.

അവര്‍ #MeToo ഉപയോഗിക്കുകയല്ല. പക്ഷേ, മീടൂ എന്ന പേര് ഉല്‍പ്പന്നങ്ങള്‍ വിറ്റഴിയുന്നതില്‍ സഹായിക്കുന്നുണ്ടെന്നാണ് കമ്പനി ഉടമകള്‍ പറയുന്നത്.


ദക്ഷിണേന്ത്യന്‍ സംസ്ഥാനങ്ങളില്‍ മാത്രം വില്‍ക്കുന്ന പലഹാരങ്ങളാണ് മീടൂ കമ്പനി വില്‍ക്കുന്നത്. ഓണ്‍ലൈന്‍ ആയും ഇവര്‍ പലഹാരങ്ങള്‍ വില്‍ക്കുന്നുണ്ട്. മീടൂ എന്ന ബ്രാന്‍ഡില്‍ പുറത്തിറക്കിയ ഹല്‍വയാണ് ക്യാംപയ്‍ന്‍ വന്നതോടെ ശ്രദ്ധിക്കപ്പെട്ടത്.


ഓണ്‍ലൈനില്‍ തങ്ങളുടെ ഉല്‍പ്പന്നങ്ങള്‍ക്ക് 20 ശതമാനം അധിക വില്‍പ്പനയുണ്ടെന്നാണ് മീടൂ കമ്പനി അവകാശപ്പെടുന്നത് - സമയം തമിഴ്‍ റിപ്പോര്‍ട്ട് ചെയ്യുന്നു. മീടൂ മാര്‍ക്കറ്റിങ്ങിന് ഉപയോഗിക്കാന്‍ ശ്രമിക്കുന്നില്ലെന്നാണ് ബ്രാന്‍ഡ്‍ ഉടമ, മൊഹിദ്ദീന്‍ റിസ്‍വി പറയുന്നത്.


"മീടൂ എന്ന പേര് തിരിച്ചടിയാകുമോ എന്ന് അറിയില്ല. എന്തായാലും പ്രമോഷന് ഇത് ഉപയോഗിക്കില്ല. സോഷ്യല്‍ മീഡിയയിലൂടെ അപ്രതീക്ഷിതമായി ലഭിച്ച ശ്രദ്ധയ്‍ക്ക് സന്തോഷമുണ്ട്." റിസ്‍വി പറഞ്ഞു.