കൺപീലി വരെ മഞ്ഞാകും; സൈബീരിയയിൽ മൈനസ് 62

അതിശൈത്യത്തെ തുടര്‍ന്ന് കണ്‍പീലികളില്‍ വരെ മഞ്ഞുറഞ്ഞുകൂടും. സോഷ്യൽമീഡിയയിൽ ഈ ചിത്രങ്ങൾ വൈറലാവുകയാണ്. ഭൂമിയിലെ ജനവാസമുള്ള ഏറ്റവും ശൈത്യമേറിയ പ്രദേശങ്ങളില്‍ ഒന്നായ റഷ്യയിലെ സൈബീരിയയിലെ ഒയ്മ്യാകോണില്‍ താപനില -62 ഡിഗ്രി വരെയായി താഴ്ന്നിരിക്കുകയാണ്. റഷ്യയിലെ യകൂസ്കിലും സ്ഥിതി വ്യത്യസ്തമല്ല. ഇവിടെ നിന്നുള്ള ജനങ്ങൾ സോഷ്യൽമീഡിയയിൽ പങ്കുവെച്ച ചിത്രങ്ങളാണിത്.

താപനില താഴ്ന്നതിനെ തുടര്‍ന്ന് സാധാരണ തെര്‍മോ മീറ്ററുകള്‍ പൊട്ടിത്തകര്‍ന്നു. തുടര്‍ന്ന് ഇലക്ട്രോണിക് തെര്‍മോമീറ്റര്‍ ഉപയോഗിച്ച് പരിശോധിച്ചപ്പോള്‍ താപനില -62 ഡിഗ്രി സെല്‍ഷ്യസില്‍ എത്തിയതായി കണ്ടെത്താന്‍ കഴിഞ്ഞെന്ന് സൈബീരിയന്‍ ടൈംസ് റിപ്പോര്‍ട്ട് ചെയ്തിരിക്കുകയാണ്. ശൈത്യം രൂക്ഷമായതോടെ താപനില പരിശോധിച്ച ചിലരുടെ ഇലക് ട്രോണിക് തെര്‍മോമീറ്ററും തകരാറിലായി.


അനസ്താസ്യ ഗ്രുസ്‌ഡേവ എന്ന ഉപയോക്താവ് കണ്‍പീലികളില്‍ മഞ്ഞുറഞ്ഞ തന്റെ ചിത്രം ഇന്‍സ്റ്റഗ്രാമില്‍ പോസ്റ്റ് ചെയ്തിരുന്നു. ചിത്രം വൈറലായി. പുറകെ മറ്റുപലരും ചിത്രങ്ങൾ പങ്കുവച്ചു. അതേസമയം ഒയ്മ്യകോണില്‍ -67 ഡിഗ്രി സെല്‍ഷ്യസോളം താപനില താഴ്ന്നിട്ടുണ്ടെന്നാണ് പ്രദേശവാസികൾ പറയുന്നത്.