അയ്യോ സാറേ പോകല്ലേ; പൊട്ടിക്കരഞ്ഞ് വിദ്യാര്‍ഥികള്‍

തമിഴ് നാട്ടിൽ നിന്നുള്ളൊരു ചിത്രം ഫേസ്ബുക്കിൽ വൈറലായിരിക്കുകയാണ്. ഒരു സ്കൂളിലെ അധ്യാപകനെ വട്ടംപിടിച്ചിരിക്കുന്ന കുട്ടികളാണ് ചിത്രത്തിൽ. സ്കൂളിൽ നിന്നും സ്ഥലം മാറി പോകുന്ന അധ്യാപകനെ പോകാൻ അനുവദിക്കാതെ വിദ്യാർഥികള്‍ തടഞ്ഞുവച്ചിരിക്കുകയാണ്. സ്കൂളിന്‍റെ ഗേറ്റ് അടച്ചും പൊട്ടിക്കരഞ്ഞും തങ്ങളുടെ ഏറ്റവും പ്രിയപ്പെട്ട അധ്യാപകന്‍റെ സ്ഥലംമാറ്റത്തെ എതിർക്കുകയാണവർ. ഇതൊക്കെ ചെയ്തതിന് അവസാനം ഫലമുണ്ടായി. അവരുടെ സ്‌നേഹത്തിന് മുന്നില്‍ അധികൃതര്‍ പത്തിതാഴ്ത്തി. അധ്യാപകന്‍റെ സ്ഥലം മാറ്റ ഉത്തരവ് മരവിപ്പിച്ചതോടെ വിദ്യാർഥികള്‍ ആഹ്ളാദത്തിലുമായി.

കഴിഞ്ഞദിവസം തമിഴ്‌നാട്ടിലെ തിരുവള്ളൂരിലാണ് സംഭവമുണ്ടായത്. അവിടെ വെള്ളിങ്ങരം സര്‍ക്കാര്‍ സ്‌കൂളിലെ ഭഗവാൻ എന്ന അധ്യാപകനു പിന്നാലെയാണ് കരഞ്ഞുകൊണ്ട് കുട്ടികള്‍ വട്ടംകൂടിയത്. 2014 ല്‍ സ്‌കൂളിലെത്തിയ ഇംഗ്ലീഷ് അധ്യാപകനാണ് ഈ 28 കാരൻ. പഠനത്തിൽ പിന്നോട്ടായിരുന്ന സ്‌കൂളിനെ അദ്ദേഹം മുന്നിലെത്തിച്ചു. എസ്എസ്എല്‍എസി അടക്കമുള്ള പരീക്ഷകളില്‍ സ്കൂളിന് മികച്ച വിജയം സമ്മാനിക്കാൻ അദ്ദേഹത്തിനായി.

പക്ഷേ എല്ലാവരേയും സ്തംബ്ധരാക്കി അദ്ദേഹത്തെ സ്ഥലം മാറ്റാനുള്ള ഉത്തരവ് വരികയായിരുന്നു. സ്‌കൂളിലെ അദ്ദേഹത്തിന്‍റെ അവസാന ദിവസത്തിൽ അദ്ദേഹത്തെ പുറത്തേക്കിറക്കാൻ വിദ്യാർഥികള്‍ സമ്മതിച്ചില്ല. തന്നോടുള്ള കുട്ടികളുടെ സ്‌നേഹത്തിന് മുന്നില്‍ അദ്ദേഹത്തിനും കണ്ണീരടയ്ക്കാൻ കഴിഞ്ഞില്ല. അവസാനം അധികൃതർ സ്ഥലം മാറ്റ ഉത്തരവ് മരവിപ്പിച്ചിരിക്കുകയാണിപ്പോള്‍.

കടപ്പാട്: ദ ന്യൂസ് മിനിറ്റ്