ഭീതി പടർത്തുന്ന കൊറോണയാണ് ഇന്ന് ലോകമെങ്ങും ചർച്ച ചെയ്യുന്നത്. ജപ്പാനിലും കൊറോണ മരണം സ്ഥിരീകരിച്ചതോടെ ലോകം മുൾമുനിയിലായിരിക്കുകയാണ്. പലയിടങ്ങളിൽ നിന്നായി പലതരത്തിലുള്ള വീഡിയോകളും പുറത്ത് വന്ന് കൊണ്ടിരിക്കുയാണ്. അത്തരത്തിൽ ഒരു വീഡിയോയാണ് ഇപ്പോൾ സമൂഹ മാധ്യമങ്ങളിൽവൈറലാകുന്നത്.
കൊറോണ ബാധിച്ച് ആശുപത്രികളിൽ ചികിത്സയിൽ കഴിയുന്ന വൃദ്ധദമ്പതികളുടെ വീഡിയോയാണ് സമൂഹ മാധ്യമങ്ങളിൽശ്രദ്ധ നേടുന്നത്. കൊറോണ വൈറസ് ബാധിച്ച ആൾ കൊറോണ വൈറസ് ബാധിച്ച ഭാര്യയെ ചികിത്സിക്കുന്ന ദൃശ്യങ്ങളാണ് വീഡിയോയിലുള്ളത്. കൊറോണ ബാധിച്ച് കിടക്കുന്ന ഭാര്യയ്ക്ക് ആഹാരവും വെള്ളവും നൽകുന്നതാണ് വീഡിയോയിലുള്ളത്.
ചൈനീസ് മാധ്യമമായ പീപ്പിള്സ് ഡെയ്ലിയാണ് വീഡിയോ ട്വിറ്ററിൽ പങ്കുവെച്ചിരിക്കുന്നത്. 'അവസാന ശ്വാസം വരെ നിന്നെ ഞാൻ പ്രണയിക്കും' എന്ന അടിക്കുറിപ്പോടെയാണ് വീഡിയോ പങ്കുവെച്ചിരിക്കുന്നത്. ഇന്ന് ഫെബ്രുവരി 14 പ്രണയദിനം. ഈ ദിനത്തിൽ ഇതിലും നല്ലൊരു പ്രണയ വീഡിയോ പങ്കുവെക്കാനില്ല. ജീവന്റെ അവസാന പാതിയിലും ഒന്നിച്ച് നിന്ന് പരിചരിക്കുന്ന ഈ ദമ്പതികൾ ആളുകൾക്കിടയിൽ കൈയടി നേടുന്നതിനോടൊപ്പം തന്നെ കണ്ണ് നനക്കുകയും ചെയ്യുന്നുണ്ട്.