നെഞ്ചത്ത് കയറിയും ട്രോളാം; ടീഷര്‍ട്ടുകൾ തരംഗം

ഓര്‍മ്മയുണ്ടോ ഈ മുഖം, ചന്തുവിനെ തോല്‍പ്പിക്കാന്‍ ആവില്ല മക്കളെ, നെട്ടൂരാനോടാണോടാ നിന്റെ കളി തുടങ്ങിയ ഡയലോഗുകള്‍ പ്രിന്റ് ചെയ്ത ടി ഷര്‍ട്ടുകള്‍ കുറച്ച് നാളുകള്‍ക്ക് മുമ്പ് വരെ ട്രെന്‍ഡ് ആയിരുന്നു.

ട്രോളില്‍ മുക്കിയ ടീഷര്‍ട്ടുകളാണ് ഇപ്പോള്‍ താരം. കോട്ടന്‍ കാപ്പിഎന്ന ഫെയ്സ് ബുക്ക് പേജിലാണ് ഈ ട്രോള്‍ ടീഷര്‍ട്ടുകള്‍ പ്രത്യക്ഷപ്പെട്ടിരിക്കുന്നത്. മുഖ്യന്റെ വിവാദമായൊരു ഡയലോഗാണ് ടി ഷര്‍ട്ടിന് പുറത്ത് അച്ചടിച്ച് വന്നിരിക്കുന്നത് ഹിറ്റായിട്ടുണ്ട്.

ബഹളം വെച്ചാലും പറയേണ്ടതു പറയും, പോയി വേറേ പണിനോക്കെ’ന്നായിരുന്നു പിണറായി നിയമസഭയിൽ പറഞ്ഞത്. പിണറായിയുടെ പരാമര്‍ശത്തിനെതിരെ ട്രോളുകളിലൂടെ സോഷ്യല്‍മീഡിയയും പ്രതികരിച്ചു. ഇതിന് പിന്നാലെയാണ് മുഖ്യമന്ത്രിയുടെ വാക്കുകള്‍ ടി ഷര്‍ട്ടിന്റെ പുറത്തും അച്ചടിച്ചു വരുന്നത്.

499 രൂപയാണ് ടി ഷര്‍ട്ടിന്റെ വില. വിവിധ നിറങ്ങളിലുള്ള ടി ഷര്‍ട്ട് ചില കടകളിലും ലഭ്യമാണ്. ജനങ്ങളുടെ അഭിപ്രായങ്ങള്‍ക്ക് ഫെയ്‌സ്ബുക്കിലൂടെ മറുപടി നല്‍കിയ പ്രതിപക്ഷ നേതാവ് രമേശ് ചെന്നിത്തലയുടെ വൈറലായ ഡയലോഗും ടി ഷര്‍ട്ടില്‍ സ്ഥാനം പിടിച്ചിട്ടുണ്ട്. ട്രോളൻമാരുടെ സ്ഥിരം ഡയലോഗുകളും ഷർട്ടിൽ ഉൾപ്പെടുത്തിയിട്ടുണ്ട്.