ട്രോളന്‍മാരുടെ പ്രിയ കുമ്മേട്ടന്‍ യാത്രയാവുമ്പോള്‍

കേരളത്തിലെ ട്രോളന്മാരുടെ ചങ്ക് പറിച്ചെടുത്തു കൊണ്ടാണ് കുമ്മനം യാത്രയായത്. ഇന്ന് മിസോറാം ഗവര്‍ണറായി സ്ഥാനമേറ്റ കുമ്മനത്തിന്‍റെ ഫേസ്ബുക്ക് പേജ് തുറക്കുന്ന ആര്‍ക്കും അത് മനസിലാവും. 'അയ്യോ അച്ഛാ പോകല്ലേ' മട്ടിലാണ് കുമ്മനത്തിന്‍റെ പോസ്റ്റിനടിയിലെ കമന്‍റുകള്‍. വേറെ പണിയൊന്നുമില്ലാത്തവര്‍ക്ക് ചുമ്മാ ഇരിക്കുമ്പോള്‍ വയറു നിറയെ ചിരിച്ചു മരിക്കാനുള്ള വകയുണ്ട്.


ഗവര്‍ണര്‍ സ്ഥാനം പ്രഖ്യാപിച്ചതോടെ കുമ്മനത്തിന്‍റെ പോസ്റ്റുകളില്‍ മലയാളം അപ്പടി പടിയിറങ്ങി. ഇപ്പോള്‍ പോസ്റ്റുകള്‍ മുഴുവന്‍ ഇടുന്നത് ഇംഗ്ളീഷിലാണ്. ഗവര്‍ണര്‍ ആയെന്നു വച്ച് മലയാളം മറക്കല്ലേ എന്നാണ് ഇപ്പോള്‍ ട്രോളന്‍മാരുടെ പ്രധാന കമന്റ്.

ഇത്രയും കാലം ട്രോളിയപ്പോള്‍ ഇത്രയും വലിയ ആള്‍ ആണെന്ന് അറിഞ്ഞില്ല, ഇനിയും വരില്ലേ ഇതുവഴി എന്നൊക്കെ കമന്‍റുകള്‍ ഉണ്ട്. കുമ്മനത്തിനു വേണ്ടി മാത്രം മാറ്റി വച്ച 'ഹഹഹ' ഇമോജി കുമ്മോജിയായതും ട്രോളന്‍മാരുടെ കുമ്മനത്തോടുള്ള സ്നേഹമാണ്. ഗവര്‍ണറായാലും പതിവു പോലെ കുമ്മോജി ഇടും, അതിനു മാറ്റമൊന്നും ഉണ്ടാവില്ലെന്ന് എല്ലാവരും തറപ്പിച്ചു പറയുന്നുണ്ട്.

മിസോറാമില്‍ ചെന്നാല്‍ മലയാളികളെ പറയിപ്പിക്കരുത്, കുമ്മനടിയൊക്കെ നിര്‍ത്തണം എന്ന് സ്നേഹപൂര്‍വ്വമായ ഉപദേശമുണ്ട് കമന്റ് ബോക്സില്‍.

കുമ്മനമല്ലാതെ ട്രോളന്‍മാരുടെ ഇത്രത്തോളം ഇഷ്ടം സമ്പാദിച്ച മറ്റൊരു നേതാവില്ല. കേരളത്തിലെ ജനങ്ങളുടെ സാമാന്യധാരണയ്ക്ക് നിരക്കാത്ത പ്രസ്താവനകളും വിളിക്കാത്ത ചടങ്ങുകള്‍ക്കും ഇടയ്ക്ക് കയറിച്ചെല്ലുന്നതും എത്ര ട്രോള്‍ ഇറങ്ങിയാലും മരപ്പാവ പോലെ മറുപടിയൊന്നുമില്ലാതെ നില്‍ക്കുന്നതുമൊക്കെയാണ് കുമ്മനത്തെ ട്രോള്‍ ലോകത്തിന് ഇത്ര പ്രിയങ്കര
നാക്കിയത്.

കുമ്മനം അങ്ങ് മിസോറാമില്‍ എത്തിക്കഴിഞ്ഞാല്‍ ഇവിടത്തെ ട്രോളന്മാര്‍ എന്തു ചെയ്യുമെന്ന് കണ്ടറിയണം.