കാഴ്ച്ച തിരിച്ചു കിട്ടിയിട്ടില്ലെന്ന് വൈക്കം വിജയലക്ഷ്മി

ചികിത്സയിലൂടെ തനിക്ക് കാഴ്ച്ച തിരിച്ചു കിട്ടിയെന്ന രീതിയില്‍ പ്രചരിക്കുന്ന വാര്‍ത്തകള്‍ വ്യാജമാണെന്ന് ഗായിക വൈക്കം വിജയലക്ഷമി. ദിവസങ്ങളായി ചികിത്സയിലാണെന്നല്ലാതെ കാഴ്ച്ച തിരിച്ചു കിട്ടിയിട്ടില്ലെന്ന് വിജയലക്ഷ്മി വ്യക്തമാക്കി. ഇപ്പോള്‍ മരുന്ന് കഴിച്ചുകൊണ്ടിരിക്കുകയാണ്. താനും അച്ഛനും നടത്തിയ ഒരു പ്രസ്താവനയായിരിക്കാം തെറ്റിദ്ധരിക്കപ്പെട്ട് കാഴ്ച്ച കിട്ടി എന്ന രീതിയില്‍ പ്രചരിച്ചതെന്നവര്‍ പറയുന്നു.

ഗായിക വൈക്കം വിജയലക്ഷ്മിക്ക് കാഴ്ച്ച തിരിച്ചു കിട്ടി എന്ന രീതിയിലായിരുന്നു വിവിധ ഓണ്‍ലൈന്‍ മാധ്യമങ്ങളടക്കം റിപ്പോര്‍ട്ട് ചെയ്തത്. ജന്‍മനാ കാഴ്ചയില്ലാത്ത വിജയലക്ഷ്മിക്ക് നേരിയ തോതില്‍ കാഴ്ച ലഭിച്ചു തുടങ്ങിയതായി ഡോക്ടര്‍മാര്‍ അറിയിച്ചു എന്നും റിപ്പോര്‍ട്ടുകളുണ്ടായിരുന്നു.വൈകാതെ തന്നെ പൂര്‍ണ്ണമായും കാഴ്ച തിരിച്ചു കിട്ടുമെന്നാണ് പ്രതീക്ഷിക്കുന്നതെന്നാണ് വിജയലക്ഷ്മിയെ ചികിത്സിക്കുന്ന ഡോക്ടര്‍മാര്‍ വ്യക്തമാക്കിയത് .

കാഴ്ച്ച ലഭിക്കുന്നതിനായി കുറച്ചു നാളായി ഹോമിയോ ചികിത്സയിലാണ്. ആകെ നൂറു ഡോസാണ് മരുന്ന്. മാസം ഒരു ഡോസെന്ന രീതിയിലാണ് കഴിക്കുന്നത്. ഇപ്പോള്‍ 10 ഡോസ് കഴിഞ്ഞു.വിജയലക്ഷ്മി പറയുന്നു. ട്യൂബ് ലൈറ്റിലേക്കും മറ്റും നോക്കുമ്പോള്‍ നേരിയ വെളിച്ചം തോന്നുന്നുണ്ട്. ഈ മാറ്റത്തെ കുറിച്ചാണ് താനും അച്ഛനും സൂചിപ്പിച്ചത്. ആധികാരികത ഉറപ്പുവരുത്താതെ ഇത്തരത്തില്‍ പ്രചരണം നടത്തുന്നതിനെതിരെ സോഷ്യല്‍ മീഡിയയില്‍ കടുത്ത വിമര്‍ശനങ്ങള്‍ ഉന്നയിച്ചിരിക്കുകയാണ് താരം.

vaikom vijayalakshmi against fake news.