പൂച്ച സ്നേഹിയുടെ കബറില്‍ കെട്ടിപിടിച്ച്‌ കരഞ്ഞ് പൂച്ച

ക്വാലാലംപൂര്‍: യജമാനന്മാരോടുള്ള നായ്ക്കളുടെ സ്നേഹം പതിവു കാഴ്ചയാണ്. എന്നാല്‍ വ്യത്യസ്തമായി ആളുകളെ അമ്പരപ്പിച്ചുകൊണ്ട് സമൂഹ മാധ്യമങ്ങളില്‍ വൈറലായികൊണ്ടിരിക്കുന്നത് പൂച്ചയുടെ സ്നേഹമാണ്. മരിച്ചു പോയ വ്യക്തിയുടെ കബറടക്കം ചെയ്ത സ്ഥലത്തു നിന്നും വിട്ടുമാറാതെ കബറടക്കത്തില്‍ കിടന്നും കുഴി മാന്തിയും കരഞ്ഞും അതിനു ചുറ്റം നടക്കുന്ന പൂച്ചയുടെ സ്നേഹം ആളുകളെ അമ്പപ്പിക്കുകയാണ് ചെയ്യുന്നത്.

മലേഷ്യയില്‍ നിന്നുള്ള സൊഫ്വാന്‍ എന്നയാളാണ് സമൂഹമാധ്യമങ്ങളിലൂടെ ഈ ദൃശ്യങ്ങള്‍ പങ്കുവച്ചത്. ഇദ്ദേഹത്തിന്‍റെ മുത്തശ്ശനായ ഇസ്മായില്‍ മാറ്റിന്‍റെ ശവസംസ്കാര ചടങ്ങുകള്‍ക്കിടയിലേക്കാണ് ഒരു വെളുത്ത പൂച്ച കടന്നു വന്നത്. ചുറ്റും അപരിചിതരായ ആളുകള്‍ കൂടിനില്‍ക്കുന്നതൊന്നും കാര്യമാക്കാതെ പൂച്ച അസ്വാഭാവികമായി പെരുമാറാന്‍ തുടങ്ങി. കബറടക്കിയ സ്ഥലത്തെ മണ്‍കൂന കൈകകള്‍കൊണ്ടു മാന്തി മാറ്റാനായിരുന്നു ആദ്യം ശ്രമിച്ചത്. അദ്ദേഹത്തിന്‍റെ മകള്‍ പൂച്ചയെ അവിടെ നിന്നും പിടിച്ചു മാറ്റാന്‍ ശ്രമിച്ചെങ്കിലും മാറാന്‍ പൂച്ച തയാറായില്ല.


പിടിച്ചു മാറ്റാന്‍ ശ്രമിച്ചപ്പോഴെല്ലാം മണ്‍കൂനയില്‍ കൂടുതല്‍ ചേര്‍ന്നു കിടക്കാനാണു പൂച്ച ശ്രമിച്ചത്. ഈ ദൃശ്യം ചുറ്റിനും കൂടി നിന്നവരുടെയും ബന്ധുക്കളുടെയും കണ്ണുകളെ ഈറനണിയിച്ചു. പള്ളിയില്‍ കബറടക്കിയ ശേഷം എല്ലാവരും പോയെങ്കിലും പൂച്ച അവിടെ നിന്നും മാറാന്‍ തയ്യാറായിട്ടില്ല. ദിവസങ്ങള്‍ക്കു ശേഷവും പൂച്ച അതിനു സമീപം തന്നെ അലഞ്ഞു തിരിയുന്നുണ്ടെന്നാണ് ഗ്രാമവാസികള്‍ പറയുന്നതെന്ന് ബന്ധുക്കള്‍ വ്യക്തമാക്കി. മരിച്ച ഇസ്മയില്‍ പൂച്ചകളെ വളരെ ഇഷ്ടപ്പെട്ടിരുന്ന ആളായിരുന്നു. എന്നാല്‍ അദ്ദേഹം പൂച്ചകളെ വളര്‍ത്തിയിരുന്നിതായി ആര്‍ക്കും അറിയില്ല. അതുകൊണ്ടുതന്നെ പൂച്ച ഏതാണെന്ന കാര്യത്തില്‍ വ്യക്തതയില്ല. എന്നാല്‍ പൂച്ചകളില്‍ ഇത്തരത്തിലുള്ള അസാധാരണമായ പെരുമാറ്റം ഇതുവരെ എവിടെയും കണ്ടെത്തിയിട്ടില്ല. തികച്ചും 'അസാധാരണമായ പെരുമാറ്റം' എന്നാണ് പൂച്ചകളുടെ സ്വഭാവത്തേക്കുറിച്ചു ഗവേഷണം നടത്തുന്ന ലണ്ടന്‍ സ്വദേശിയായ അനിത കെല്‍സി പറയുന്നത്. സെപ്റ്റംബറില്‍ പോസ്റ്റ് ചെയ്ത ഈ വിഡിയോ ഇതുവരെ ഒരുകോടിയിലധികം ആളുകള്‍ കണ്ടുകഴിഞ്ഞു.

viral video of a cat

viral video of a cat from Malaysia.