വിഷ്ണുവിന്‍റെ വവ്വാൽ ക്ലിക്ക് സോഷ്യൽമീഡിയയിൽ വൈറൽ

മരത്തിന്‍റെ മുകളിൽ കിടന്ന് ഒറ്റ ക്ലിക്ക്. അതോടെ താരമായിരിക്കുകയാണിപ്പോള് തൃശൂര്‍ തൃപ്രയാര്‍ പെരിങ്ങോട്ടുകര വിഷ്ണു എന്ന ഫോട്ടോഗ്രാഫർ. വവ്വാല്‍ ക്ലിക്ക് എന്ന പേരിലാണ് വിഷ്ണുവിന്‍റെ വെറൈറ്റി ക്ലിക്ക് വൈറലാവുന്നത്. സോഷ്യല്‍ മീഡിയയില്‍ പലരും പരിഹാസം കൊണ്ട് മൂടിയപ്പോള്‍ നല്ലൊരു ഫ്രെയിം കിട്ടാന്‍ താന്‍ നടത്തിയ സാഹസികതയേയും ആത്മാര്‍ത്ഥതയേയും മറ്റുചിലർ പ്രശംസിച്ചുവെന്ന് വിഷ്ണുവിന്‍റെ വാക്കുകള്‍.

പെരിങ്ങോട്ടുകര സ്വദേശികളായ ഷെയ്സിന്‍റെയും നവ്യയുടെയും വിവാഹത്തിനാണ് വിഷ്ണുവിന്‍റെ വവ്വാൽ ക്ലിക്ക് നടന്നത്. രണ്ടു പേരുടെയും ഫോട്ടോഗ്രാഫി വര്‍ക്ക് വിഷ്ണു പ്രവര്‍ത്തിക്കുന്ന വൈറ്റ് റാമ്പ് എന്ന സ്ഥാപനത്തിനായിരുന്നു. ഓരോ വര്‍ക്കിലും പുതുമയുള്ള ഫ്രെയിമിനു വേണ്ടി എന്തെങ്കിലും ചെയ്യാറുണ്ട്. അങ്ങനെയാണ് മരത്തില്‍ കയറി വെര്‍ട്ടിക്കല്‍ ക്ലിക്ക് ആകാമെന്ന് തോന്നിയത്. വധുവരന്മാരുടെ സഹകരണം കൂടി ആയതോടെ മരത്തിൽ തൂങ്ങി ക്ലിക്കെടുക്കാമെന്നായി.

മരക്കൊമ്പില്‍ തലകീഴായി വിഷ്ണു ചിത്രമെടുക്കുന്നത് സുഹൃത്ത് ക്യാമറയിലാക്കിയിരുന്നു. സുഹൃത്ത്‌ റിജോയ് ആണ് ആ ദൃശ്യം പകര്‍ത്തിയത്. ‘ഞാനെടുത്ത ഫോട്ടോകള്‍’ എന്ന ഫേസ്ബുക്ക് പേജില്‍ ഈ ചിത്രം ഇട്ടോട്ടെ എന്ന് റിജോയ് ചോദിച്ചു. വിഷ്ണു സമ്മതിച്ചതോടെയാണ് സംഭവം വവ്വാൽ ക്ലിക്കെന്ന പേരിൽ വൈറലായത്.