ഭക്ഷണം വിളമ്പിയതിന് 86000 രൂപ ടിപ്പ്: കണ്ണുനിറഞ്ഞ് ഹോട്ടല്‍ വെയ്ട്രസ്

ഒട്ടാവ: ഹോട്ടലില്‍ ഭക്ഷണം കഴിക്കാനെത്തിയവര്‍ക്ക് നല്‍കാനായി ബില്ല് എടുത്തപ്പോള്‍ ജെന്നിഫര്‍ പീച്ച് വിചാരിച്ചത് ഭക്ഷണം കഴിച്ചവര്‍ക്ക് ബില്ലില്‍ ടിപ്പിന്‍റെ പണം ചേര്‍ത്തപ്പോള്‍ തെറ്റിപ്പോയെന്നാണ്. എന്നാല്‍ ഭക്ഷണം കഴിച്ച സ്ത്രീയുടെ മറുപടി കേട്ടപ്പോള്‍ ജെന്നിഫറിന്‍റെ കണ്ണുനിറഞ്ഞു. 1000 ഡോളര്‍ (ഏകദേശം 86000 ഇന്ത്യന്‍ രൂപ) തനിക്ക് ടിപ്പ് ആയി നല്‍കിയ ലിസ ഹോള്‍ഗറ്റിനെ കെട്ടിപ്പിടിച്ചു കരഞ്ഞുകൊണ്ടാണ് ജെന്നിഫര്‍ തന്‍റെ നന്ദി പ്രകടിപ്പിച്ചത്.

കാനഡയിലെ വിന്നിപെഗ്ഗിലുള്ള ഒരു ഹോട്ടലില്‍ വെയ്ട്രസ് ആയി ജോലി ചെയ്യുന്ന ജെന്നിഫറിനു മുന്നിലേക്കാണ് ദൈവം ലിസയുടെ രൂപത്തില്‍ വന്നെത്തിയത്. തന്‍റെ ഭാവി പഠനത്തിന് പണം കണ്ടെത്താനും ക്രെഡിറ്റ് കാര്‍ഡിന്‍റെ പണം തിരിച്ചടക്കാനുമായി ദിവസേന രണ്ടു ഹോട്ടലുകളില്‍ ജോലിചെയ്യുകയാണ് 20കാരിയായ ജെന്നിഫര്‍. മറ്റൊരു ജീവനക്കാരി ജോലിക്കെത്താതിരുന്നതിനാലാണ് തന്‍റെ അവധി ദിവസമായിട്ടുകൂടി ജെന്നിഫറിന് കഴിഞ്ഞ ശനിയാഴ്ച ഹോട്ടലില്‍ എത്തേണ്ടി വന്നത്.

പതിവില്‍ അധികം തിരക്കുണ്ടായിരുന്നതിനാല്‍ എല്ലാവരെയും നല്ലപോലെ ശ്രദ്ധിക്കാനായില്ല. ജെന്നിഫര്‍ തിരക്കിട്ട് ജോലി ചെയ്തുകൊണ്ടിരിക്കുമ്പോള്‍ ക്ഷമയോടെ ഭക്ഷണത്തിനായി കാത്തിരുന്ന ലിസ ഒരിക്കലും മറക്കാനാവാത്ത സമ്മാനമാണ് ജെന്നിഫറിനു നല്‍കിയത്. ലിസയെ കെട്ടിപ്പിടിച്ചു കരഞ്ഞെങ്കിലും പേരു ചോദിക്കാന്‍ മറന്നുപോയ ജെന്നിഫര്‍ ഫെയ്‍സ്ബുക്കിലൂടെ തന്‍റെ കഥ പുറം ലോകത്തെ അറിയിച്ചാണ് ലിസയെ തേടി കണ്ടുപിടിച്ചത്.

താന്‍ മുന്‍പ് വെയ്ട്രസ് ആയി ജോലി ചെയ്തിട്ടുണ്ടെന്നും ആ ജോലിയുടെ കഷ്ടപ്പാട് എന്താണെന്ന് തനിക്കറിയാമെന്നുമായിരുന്നു ലിസയുടെ പ്രതികരണം.

A waitress in Canada received Rupees 86000 tip from a customer that brought her to tears.