മെഴുകിൽ തീർത്ത മമ്മൂക്കയും ലാലേട്ടനും

മമ്മൂട്ടിയുടെയും മോഹൻലാലിന്‍റെയും മെഴുകിൽ തീർത്ത ശില്പവുമായി ഒരു കലാകാരൻ. പത്തനംതിട്ട സ്വദേശി ഹരികുമാറാണ് ഈ ശില്പങ്ങൾക്ക് പിന്നിൽ. കേരളത്തിൽ സിനിമാ താരങ്ങളുടെ മെഴുക് മ്യൂസിയം എന്ന ആശയമാണ് ഇതുവഴി ഈ കലാകാരൻ നടപ്പിലാക്കിയിരിക്കുന്നത്. ഷാരൂഖ് ഖാൻ, രജനീകാന്ത്, എപിജെ അബ്‍ദുള്‍ കലാം എന്നിവരുടെ പ്രതിമകളും ഹരികുമാര്‍ നിർമ്മിച്ചിട്ടുണ്ട്. ഇതുവരെയായി ഏഴ് മെഴുക് പ്രതിമകൾ ഈ കലാകാരൻ ഉണ്ടാക്കിയിട്ടുണ്ട്.



ഒറ്റ നോട്ടത്തിൽ ആരും തന്നെ സംശയിച്ച് പോകും ഇത് യഥാർത്ഥ സൂപ്പർ സ്റ്റാറുകൾ തന്നെയോ എന്ന്. അടുത്തെത്തി നോക്കിയാലും മെഴുക് പ്രതിമകളാണെന്ന് വിശ്വസിക്കണമെങ്കിൽ അല്പം പ്രയാസമാണ്. മുടി, മീശ, കണ്ണുകൾ എല്ലാം അതേപടി. അഞ്ച് വർഷത്തെ കഠിനപ്രയത്നത്തിന് ഒടുവിലാണ് ഹരികുമാർ താരരാജക്കന്മാരുടെ ഈ മെഴുക് പ്രതിമ യാഥാർത്ഥ്യമാക്കിയത്.




ഓരോ മെഴുക് പ്രതിമയ്ക്കും ചെലവായത് ഒന്നരലക്ഷം രൂപ വീതമാണ്. കളിമണ്ണിലുണ്ടാക്കിയ മോൾഡിൽ നിശ്ചിത താപത്തില്‍ മെഴുകുരുക്കിയൊഴിച്ച് നിറം ചേര്‍ത്താണ് ശില്പങ്ങൾ ഉണ്ടാക്കുന്നത്. വിദേശത്തുനിന്ന് ഇറക്കുമതി ചെയ്യുന്ന മെഴുകാണ് ഇതിനുപയോഗിക്കുന്നത്. മെഴുക് ഉണങ്ങും മുന്‍പെ മുടിയും രോമവുമെല്ലാം വെച്ചുപിടിപ്പിക്കും. ശരിക്കുള്ള മുടിയും വസ്ത്രങ്ങളുമെല്ലാമാണ് ഉപയോഗിക്കുന്നത്. കേരളത്തിൽ ഒരു മെഴുകു മ്യൂസിയം എന്ന ലക്ഷ്യവും സ്വപ്നവുമാണ് ഈ കലാകാരനുള്ളത്.