അമേരിക്ക നിങ്ങളെ മിസ് ചെയ്യും മിസ്റ്റർ ഒബാമ

ഡൊണാൾഡ് ട്രംപ് വൈറ്റ് ഹൗസ് വാഴാൻ കയറുമ്പോൾ പടിയിറങ്ങുന്ന ഒബാമയെന്ന അമേരിക്കയുടെ മുൻ പ്രസിഡന്റിനെ നമ്മൾ മിസ് ചെയ്യും തീർച്ച. കഴിഞ്ഞ 8 വർഷത്തെ ഭരണത്തിൽ ഒബാമയെന്ന കറുത്ത വർഗക്കാരൻ അമേരിക്കക്ക് സമ്മാനിച്ചത് സാധരണകാരനായ പ്രസിഡന്‍റ് എന്ന അമേരിക്കക്ക് ഏറെ പരിചിതം അല്ലാതിരുന്ന ഒരു കാഴ്ച്ചയാണ്.



നാലുകോണിലും പ്രതിഫലിക്കുന്ന കരുത്തുറ്റ ശബ്‍ദം, വാക്കുകൾക്ക് ക്ഷാമമില്ലാതെ മനോഹരമായി സംസാരിക്കുന്ന വാചാലൻ. കണ്ണീരും ചിരിയും പൊട്ടിച്ചിരിയും ഒളിപ്പിക്കാത്ത വളരെ സെൻസിറ്റീവ് ആയ ഒരു സാധാരണ മനുഷ്യൻ.



കൊളംബിയ യൂണിവേഴ്സിറ്റിയിൽ നിന്നും ഹാർവാർഡ് ലോ സ്കൂളിൽ നിന്നുമായിരുന്നു ഒബാമ ബിരുദങ്ങൾ സ്വന്തമാക്കിയത്. അധ്യാപകനായി സേവനമനുഷ്ഠിച്ച ഒരേ ഒരു അമേരിക്കൻ പ്രസിഡന്റ്.



ലോകം ഏറ്റവും കൂടുതൽ കേട്ട പ്രസംഗങ്ങളിൽ പലതും ഒബാമയുടേതായിരുന്നു. വാക്‌ചാതുര്യത്തിലും നർമ ബോധത്തിലും മറ്റേത് രാഷ്ട്ര തലവന്മാരെക്കാൾ മിടുക്കനായിരുന്നു ഒബാമ.

തന്റെ സെനറ്റ് ജീവിതത്തെക്കുറിച്ച് പരാമർശിച്ചതിന് ശേഷം തന്റെ സ്ഥാനാർത്ഥിത്വത്തെ എബ്രാഹം ലിങ്കന്റെ ഹൗസ് ഡിവൈഡഡ് പ്രസംഗവുമായി താരതമ്യപ്പെടുത്തിക്കൊണ്ടാണ് ഒബാമ തന്റെ സ്ഥാനാർത്ഥിത്വം പ്രഖ്യാപിച്ചത്. ലോകത്തെ ഏറ്റവും മികച്ച പ്രസംഗങ്ങളിൽ ഒന്നാണ് ഇത്.



സിനിമയെ കുറിച്ചും പോപ്പ് സംഗീതത്തെ കുറിച്ചും പട്ടികളെ കുറിച്ചും ഭക്ഷണത്തെ കുറിച്ചും സംസാരിക്കുന്ന പ്രസിഡന്റ്.



മകളുടെ പ്രണയത്തെ അവള്‍ പ്രേമിക്കട്ടെ എന്ന് പറഞ്ഞ സൂപ്പർ കൂൾ അച്ഛൻ. യേൽ, ഹാർഡ്‌വാഡ്‌ തുടങ്ങിയ ഫാൻസി യൂണിവേഴ്സിറ്റികളല്ലാതെ രാജ്യത്ത് സാധാരണക്കാർ പഠിക്കുന്ന നിരവധി കോളേജുകളുണ്ട് എന്ന് മകളെ ഉപദേശിച്ച അച്ഛൻ. അവൾ അവളുടെ അമ്മയെ പോലെയാണ്, അവൾക്കറിയാം അവളെന്താണെന്ന് എന്ന് അഭിമാനപൂർവം പറയുന്ന ഒബാമ എന്ന ഡാഡി.



അമേരിക്കയുടെ ഫസ്റ്റ് ലേഡിയുടെ ജെന്‍റിൽ മാൻ. മിഷെലിന്റെയും ഒബാമയുടെയും റൊമാൻസും നൃത്തവും യാത്രകളും. ഇരുവരുടെയും മനോഹരമായ നൃത്തചുവടുകളിൽ നിറഞ്ഞു നിന്നിരുന്ന തീവ്രമായ പ്രണയം.



അമേരിക്ക മാത്രമല്ല ഇന്ത്യയിലെ പാവം ട്രോളന്മാരും ഇനി ഒബാമയെ മിസ് ചെയ്യും. മോദിയെ ട്രോളാൻ ട്രോൾ പേജുകളിൽ നിറഞ്ഞു നിന്നിരുന്നതും ഒബാമയായിരുന്നു. എങ്ങനെ മറക്കാനാകും യു ആർ വെൽക്കം എന്ന് പറഞ്ഞതിന് ഇങ്ങു കേറി പോന്ന മോദി ചേട്ടനെ.



അവസാന പ്രസംഗത്തിൽ ഒബാമ ഒൗട്ട് എന്ന് സ്വയം പ്രഖ്യാപിച്ച് മൈക്ക് താഴെയിട്ട ബാറക്ക് ഹുസൈന്‍ ഒബാമ എന്ന അമേരിക്കയുടെ നാല്പത്തിനാലാമത് പ്രസിഡന്‍റിന്‍റെ സിനിമാ സ്റ്റൈൽ പടിയിറക്കം.