50 മദ്യ ഗ്ലാസ് കൊണ്ട് അലങ്കരിച്ച വിവാഹ വസ്ത്രം; വൈറലായി വധു

സ്കോട്ടിഷ് യുവതി കെറി മക്മില്ലന്‍റെ വിവാഹ വസ്ത്രം കണ്ടാൽ ആരായാലും മൂക്കത്ത് വിരൽ വെച്ചുപോകും. വെറൈറ്റിയൊക്കെ ആകാം, എന്നാലും ഇത് വല്ലാത്തൊരു വെറൈറ്റിയായിപ്പോയി എന്നുവേണം പറയാൻ. വിവാഹ ദിവസം ഏറ്റവും വ്യത്യസ്തമായ വസ്ത്രങ്ങൾ ധരിക്കാൻ തന്നെയാകും വധുവായാലും വരനായാലും ആഗ്രഹിക്കുക. കെറി മക്മില്ലനും അതെ ആഗ്രഹിച്ചുള്ളൂ. എന്നാൽ കെറിയുടെ ഈ വിവാഹ വസ്ത്രം ലോകശ്രദ്ധ നേടിയെടുത്തിരിക്കുകയാണ് ഇപ്പോൾ.

മദ്യം നിറച്ച 50 ഗ്ലാസുകൾ കൊണ്ട് അലങ്കരിച്ച വസ്ത്രമാണ് കെറി വിവാഹ ദിവസം അണിഞ്ഞത്.
സ്റ്റീലുകൊണ്ട് നിർമ്മിച്ച നാല് നിരയിൽ മദ്യ ഗ്ലാസുകൾ വയ്ക്കാവുന്ന തരത്തിലാണ് വിവാഹ വസ്ത്രം. മെറ്റൽ ഫ്രെയിമിനകത്ത് വിവാഹ വസ്ത്രവുമായി കയറി നിൽക്കാവുന്ന തരത്തിലാണ് കെറി വിവാഹ വസ്ത്രം ഡിസൈൻ ചെയ്തത്. സ്വപ്ന വസ്ത്രം എന്നാണ് കെറി ഇതിനെ വിശേഷിപ്പിക്കുന്നത്.

കെറിയുടെ വിവാഹ വേഷം കണ്ടാല്‍ മദ്യപിക്കുന്ന ശീലമുള്ളവര്‍ എഴുന്നേറ്റ് നിന്ന് കയ്യടിക്കും എന്നതിൽ സംശയമില്ല. വിവാഹശേഷം തന്‍റെ ഈ വസ്ത്രം വാടകയ്ക്ക് കൊടുക്കാനുള്ള പദ്ധതിയിലാണ് കെറി.