മരണത്തോട് മല്ലിട്ട് മകളും അച്ഛനും; ഹൃദയഭേദകമായ ചിത്രം പങ്കിട്ട് യുവതി

ഹൃദയത്തെ നടുക്കുന്ന ഒരു ചിത്രമാണ് ഇപ്പോൾ സാമൂഹ്യ മാധ്യമങ്ങളിലൂടെ വൈറലാകുന്നത്. യുഎസ് സ്വദേശിയായ അലി പാര്‍ക്കര്‍ എന്ന യുവതിയാണ് ചിത്രം പുറത്തുവിട്ടിരിക്കുന്നത്. ചികിത്സിക്കാനാവാത്ത അസുഖവുമായി മരണത്തോട്ട് മല്ലിട്ട് കിടക്കുന്ന മകളുടെയും മരണകിടക്കയിൽ അലമുറയിട്ട് കരയുന്ന സ്വന്തം പിതാവിന്‍റെയും ചിത്രമാണ് അലി പാർക്കർ പങ്കുവച്ചത്.

ബ്രെയ്ൻ ടൂമറുമായി ആശുപത്രിയിൽ കഴിയുകയാണ് ബ്രെയ്‌ലൈന്‍ ലോഹോന്‍ എന്ന അഞ്ചുവയസുകാരിയായ മകൾ. മരണവും കാത്ത് തൊട്ടടുത്ത കിടക്കയിൽ കിടക്കുന്നതാകട്ടെ കുട്ടിയുടെ മുത്തച്ഛനും. ഹൃദയഭേദകമായ ഒരു കാഴ്ചയാണിത്. എന്നിരുന്നാലും ആളുകൾക്കിടയിൽ ഒരു ബോധവത്കരണം ഉണ്ടാകാനാണ് ഈ ചിത്രം അലി പാർക്കർ പങ്കുവച്ചത്. ആദ്യം നമ്മൾ മരിക്കും എന്നാകും കരുതുക. എന്നാലിവിടെ ആദ്യം തന്‍റെ മകളാണ് തന്നെ വിട്ട് പോകുന്നത് എന്നാണ് ഈ അമ്മ പറയുന്നത്.

കഴിഞ്ഞ വര്‍ഷമാണ് കുട്ടിയുടെ അസുഖത്തെ കുറിച്ച് മനസ്സിലായത്. വളരെ വൈകിയതിനാൽ അസുഖം ഗുരുതരമാവുകയും ചെയ്തു. ''ഏതാനും ദിവസങ്ങൾക്കുള്ളിൽ ഈ കുഞ്ഞിനെ തനിക്ക് അടക്കം ചെയ്യേണ്ടി വരുമെന്നാണ്'' ഈ അമ്മ വേദനയോടെ പറയുന്നത്. ''ആഴ്ചകളോ മാസങ്ങളോ കഴിഞ്ഞ് അച്ഛനെയും അടക്കം ചേയ്യേണ്ടി വരും. രണ്ട് ഹീറോകളും തന്നെ വിട്ട് പിരിയുകയാണ്. എന്ത് തെറ്റാണ് ഇതിനുമാത്രം ഞങ്ങൾ ചെയ്തത്'' എന്നാണ് അലി പാർക്കർ വേദനയോടെ ചോദിക്കുന്നത്.

മെക്‌സിക്കോയില്‍ ചികിത്സ നടത്തിയപ്പോൾ ചെറിയൊരു പ്രതീക്ഷ ഉണ്ടായിരുന്നു. ഏതാണ്ട് നാല് ലക്ഷം ഡോളറാണ് ചികിത്സയ്ക്ക് വേണ്ടിവന്നത്. ഇപ്പോഴും തന്‍റെ മകള്‍ പോരാടിക്കൊണ്ടിരിക്കുകയാണ്. മറ്റു കുട്ടികളെ പോലെ നല്ല ഒരു ജീവിതത്തിനായി തന്‍റെ മകളും കൊതിക്കുന്നുണ്ട്. മറ്റൊരാൾക്കും ഈ അവസ്ഥയുണ്ടാകരുതെന്നാണ് ഈ അമ്മയുടെ പ്രാർത്ഥന.