ജനിച്ചപ്പോള്‍ 400 ഗ്രാമുള്ള കുട്ടിക്ക് ലോകസുന്ദരിയുടെ പേരിട്ടു

ജനിച്ചപ്പോള്‍ തൂക്കം 400 ഗ്രാം മാത്രം. അച്ഛന്റെ തള്ളവിരലിന്റെ വലുപ്പം മാത്രമായിരുന്നു അവളുടെ കാലുകള്‍ക്ക്. ആകെ മൊത്തം വലുപ്പം നമ്മുടെ കൈപ്പത്തിയുടെയത്രയുമേയുള്ളൂ. തൊലിക്ക് പേപ്പറിന്‍റെ കനം. പ്രസവിക്കുവാൻ 12 ആഴ്ച്ച ബാക്കി നിൽക്കെ പ്രസവിച്ച ഈ കുഞ്ഞു ജീവിച്ചിരിക്കില്ല എന്നു കരുതിയ എല്ലാവരെയും അതിശയിപ്പിച്ചു. ഇപ്പോൾ അവൾക്ക് 6 മാസം പ്രായമായിരിക്കുന്നു, സുഖമായിരിക്കുന്നതിനാൽ തന്നെ ആശുപത്രിയിൽ നിന്ന് വീട്ടിലേക്ക് വിട്ടയക്കുകയാണ്.

ഏഷ്യയിൽ മാസമെത്തും മുമ്പേ പ്രസവിച്ച കുട്ടികളിൽ ഏറ്റവും തൂക്കം കുറഞ്ഞ കുട്ടിയാണിത്. രാജസ്ഥാനില്‍ ജൂൺ 15നായിരുന്നു 48 കാരി സീതയ്ക്ക് ഇവൾ പിറന്നത്. സർക്കാർ ആശുപത്രിയിലെ ഡോ.ജംഗേദാണ് സിസേറിയനിലൂടെ ഇവളെ പുറത്തെടുത്തത്. ഇത്രയും നാളുകൊണ്ടു ഒരു ലക്ഷം രൂപ ആശുപത്രി തുക ആയെങ്കിലും അടയ്ക്കുവാൻ ആ നിർധന കുടുംബത്തിന് സാധിച്ചില്ല. രാജസ്ഥാനിലെ ആ ആശുപത്രി അധികൃതർ ആ പണം എഴുതിതള്ളി സഹായിച്ചു. 2017 ലോകസുന്ദരി മാനുഷി ചില്ലറിന്റെ പേരിൽ നിന്നാണ് ആശുപത്രിയധികൃതർ ഇവൾക്ക് മനുഷിയെന്ന പേരിട്ടിരിക്കുന്നത്.