അമലിന്‍റെ സൈറ്റ് ഇനി സുക്കര്‍ബര്‍ഗിന് സ്വന്തം!!

കൊച്ചി: ആലുവ സ്വദേശി അമല്‍ എന്ന എഞ്ചിനീയറിങ് വിദ്യാര്‍ത്ഥിയുടെ വെബ്സൈറ്റ് എഴുന്നൂറ് ഡോളറിന് മാര്‍ക്ക് സുക്കര്‍ബര്‍ഗ് സ്വന്തമാക്കി. ഫെയ്സ്ബുക്ക് സ്ഥാപകന്‍ മാര്‍ക്ക് സുക്കര്‍ബര്‍ഗിന്‍റെ മകളുടെ പേരിലുള്ള ഡൊമൈന്‍ നെയിമാണ് അമലില്‍ നിന്ന് വാങ്ങിയത്. അമൽ അഗസ്റ്റിൻ 2015 ഡിസംബറിൽ സ്വന്തമാക്കിയ മാക്സ്ചൻ സുക്കർബർഗ്.ഓർഗ് എന്ന ഡൊമെയിന്‍ നെയിമാണ് സുക്കര്‍ബര്‍ഗ്ഗിന്‍റെ കമ്പനി വാങ്ങിയത്.

തന്‍റെ കുഞ്ഞിന് മാക്സിമാ ചാൻ സുക്കർബർഗ് എന്നു പേരിട്ടെന്നു ഡിസംബറില്‍ സുക്കര്‍ബര്‍ഗ്ഗ് പറഞ്ഞിരുന്നു. തുടര്‍ന്നാണ് അമലൽ 'ഗോ ഡാഡി ഡോട്ട് കോം' എന്ന സൈറ്റ് ഉപയോഗിച്ച് മാക്സ്ചാൻ സുക്കർബർഗ് എന്ന ഡൊമൈൻ നെയിം സ്വന്തമാക്കിയത്. സുക്കർബർഗിന്റെ ധനകാര്യ ഇടപാടുകൾ കൈകാര്യം ചെയ്യുന്ന ഐക്കോണിക് ക്യാപിറ്റൽ എന്ന സ്ഥാപനത്തിന്റെ മാനേജർ സാറ ചാപ്പലാണ് അമലുമായി ഇടപാടുകൾ നടത്തിയത്. പ്രമുഖരായ വ്യക്തികളുടെ സ്ഥാപനങ്ങൾ, ബ്രാൻഡുകൾ എന്നിവയുടെ ഇന്റർനെറ്റ് വിലാസങ്ങൾ സ്വന്തമാക്കി അവർക്കു വിൽക്കുന്ന ഈ രീതിക്കു സൈബർ സ്ക്വാട്ടിങ് എന്നാണ് പറയുന്നത്.

അങ്കമാലി കിടങ്ങൂർ സ്വദേശിയായ അമൽ അഗസ്റ്റിൻ എടത്തല കെഎംഇഎ എൻജിനീയറിങ് കോളജിൽ അവസാന വർഷ ഇലക്ട്രോണിക്സ് ആൻഡ് കമ്യൂണിക്കേഷൻ വിദ്യാർഥിയാണ്. ചെറായി ബീച്ച് റിസോർട്ട് മാനേജർ അഗസ്റ്റിന്റെയും അങ്കണവാടി അധ്യാപിക ട്രീസയുടെയും മകനാണ്.